ម៉ូតូ១គ្រឿងជិះ៥នាក់ បុកជាមួយឡាន ប៉ើងខ្ទាតពេញផ្លូវ
24-July-2016 | ដោយ មែន កំសត់
ខេត្ដបាត់ដំបង ៖ យ៉ាងហោចណាស់មនុស្ស២នាក់បានស្លាប់នៅកន្លែងកើតហេតុ និង៣នាក់ទៀតរងរបួសធ្ងន់នៅក្នុងឧប្បត្តិហេតុគ្រោះថ្នាក់ចរាចរណ៍ដ៏ រន្ធត់មួយរវាងរថយន្តនិងម៉ូតូដែលបានបុកគ្នានៅចំណុចខាងមុខវត្ត តាសែន ស្ថិតក្នុងភូមិតាសែន ឃុំតាសែន ស្រុកកំរៀង កាលពីវេលាម៉ោង១១ថ្ងៃត្រង់ ថ្ងៃទី២២ កក្កដា ដោយសារបើកបរខ្វះការប្រុងប្រយ័ត្ន ។
អ្នកជិះម៉ូតូមានគ្នា៥នាក់ ហើយ២នាក់បានស្លាប់ រីឯ៣នាក់ទៀតរងរបួសធ្ងន់ ខណៈរថយន្តក្រឡាប់ផ្ងារជើង ដែលមានអ្នកជិះ២នាក់រងរបួសស្រាល ។ លោកអធិការបានប្រាប់ថា ជនរងគ្រោះដែលជិះម៉ូតូ ១-ឈ្មោះគង់ សុខវ៉ាន់ ភេទស្រី អាយុ៣៥ឆ្នាំ អ្នកឌុបស្លាប់ ២-ឈ្មោះ ម៉ាន់ ដាណេ ភេទស្រី អាយុ២ឆ្នាំ ត្រូវជាកូនស្លាប់ ៣-ឈ្មោះ ម៉ាន់ ពេជ្រ ភេទប្រុស អាយុ៦ឆ្នាំ ត្រូវជាកូនរបួសធ្ងន់ ៤-ឈ្មោះ មឿន ស្រីកា ភេទស្រី អាយុ៥ឆ្នាំ ត្រូវជាក្មួយរបួសធ្ងន់ និងទី៥មិនទាន់ស្គាល់ឈ្មោះ តែរបួសធ្ងន់ដូចគ្នា ។ ពួកគេជិះម៉ូតូម៉ាកហ្វីណូ ពណ៌ស គ្មានស្លាកលេខ ។
លោក គឹម ពន្លក បានបញ្ជាក់ថា អ្នកបើកបររថយន្តបានគេចខ្លួនក្រោយជួបគ្រោះថ្នាក់ តែត្រូវគេដឹងថា ២នាក់ប្ដីប្រពន្ធ ជិះរថយន្តម៉ាកកាមរី(បាឡែន) ពណ៌ស្ករ ពាក់ស្លាកលេខ បាត់ដំបង 2B-0199។ រថយន្តធ្វើដំណើរមកពីទិសខាងលិច ហើយម៉ូតូជិះឌុបគ្នាចេញពីខ្លោងទ្វារវត្តតាសែនឡើងលើផ្លូវជាតិ ទើបត្រូវរថយន្តបុកពេញទំហឹងតែម្ដង ។
សាក្សីដែលឃើញហេតុការណ៍បាននិយាយថា មុនពេលកើតហេតុគេឃើញជនរងគ្រោះឈ្មោះ គង់ សុខវ៉ាន់ បានជិះម៉ូតូចេញពីវត្តតាសែន ដែលមានឌុបក្មេងៗពីក្រោយ៤នាក់ផង ជាកូន និងក្មួយៗ ។ សាក្សីបន្តថា ពេលជិះចេញពីវត្ត ស្ត្រីរូបនោះហាក់មិនបានមើលឆ្វេងស្ដាំទេ លុះជិះចេញផុតពីខ្លោងទ្វារវត្តឡើងលើថ្នល់ ស្របពេលរថយន្តបើកមកពីទិសខាងលិចក្នុងល្បឿនគួរសមផង ជាន់ហ្វ្រាំងមិនទាន់ក៏បុកពេញទំហឹងបណ្ដាលឲ្យម៉ូតូខ្ទាតចេញពី ថ្នល់ រីឯអ្នកជិះក៏ខ្ទាតរប៉ាត់រប៉ាយពេញថ្នល់ដែរ ។
ប្រភពដដែលបញ្ជាក់ថា ភ្លាមៗនោះគេឃើញក្មេងស្រីតូចម្នាក់ និងស្ត្រីឈ្មោះ វ៉ាន់ ដែលជាម្ដាយ បានស្លាប់នៅនឹងកន្លែង រីឯ៣នាក់ទៀតរបួសធ្ងន់។ ដោយឡែករថយន្តក្រឡាប់ផ្ងារជើង ហើយគេឃើញអ្នកជិះ២នាក់ជាប្ដីប្រពន្ធលូនចេញដោយមានរបួសផង និងបានគេចខ្លួនបាត់ពីកន្លែងកើតហេតុភ្លាមៗដែរ ។
ចំនួនអ្នកទស្សនា
- ថ្ងៃនេះ4621
- ម្សិលមិញ6261
- សប្តាហ៍នេះ23001
- ខែនេះ138151
- ឆ្នាំនេះ138151
- សរុប20580607